Ҫӗртме уйӑхӗн 1-мӗшӗнчен Ҫӗнӗ Шупашкартан Шупашкара ҫӳрекен 61-мӗш троллейбус кӑштах маршрутне улӑштарӗ. Троллейбуссем «Шупашкар» суту-илӳ центрӗ патӗнчен Эгер бульварне, Ҫӗнӗ автовокзал енне, пӑрӑнмӗҫ, 9-мӗш Пилӗкҫуллӑх проспекчӗпе кайса «Пичет ҫурчӗ» патӗнчен иртӗҫ. Малалла хальхи маршрутпах кайӗҫ.
Маршрут ҫинче 14 троллейбус ӗҫлет. 2 транспорт резервра пулмалла. Аса илтерер: вӑл Ҫӗнӗ Шупашкарти «Иваново» микрорайона Шупашкарти Медицина центрӗпе ҫыхӑнтарать.
Ҫӗнӗ Шупашкарти «Химпром» предприяти ӗҫченӗсене хисеплӗ ят пама йышӑннӑ.
«Чӑваш Республикин промышленноҫӑн тава тивӗҫлӗ ӗҫченӗ» ята хими оборудованине юсакан 75-мӗш цех пуҫлӑхне Сергей Ермошина, ЭТС-40 производство уйрӑмӗн мастерне Александр Кожанова, 71-мӗш цех пуҫлӑхне – директорӑн производство енӗпе ӗҫлекен ҫумне Евгений Мигунова, 62-мӗш цехӑн мастерне Валерий Нестерова парас тенӗ.
Предприятин тӗп казначейӗ Майя Пыркина вара «Чӑваш Республикин тава тивӗҫлӗ экономисчӗ» пулса тӑнӑ.
«Ҫулталӑкри вӗрентекене» палӑртнӑ. Ку ята Куславккари Алевтина Алексеева тивӗҫнӗ.
Кӑҫал конкурса 1000 ытла ҫын хутшӑннӑ, 218 специалист куҫӑн майпа иртнӗ тӗрӗслев витӗр тухнӑ.
«Ҫулталӑкри воспитатель» — Дарья Жгарь (Шупашкар), «Чи лайӑх класс ертӳҫи» — Юлия Дельян (Ҫӗнӗ Шупашкар), «Ҫулталӑкри педагог-психолог» - Татьяна Анилина (Куславкка районӗнчи Тӗрлемес шкулӗ), «Ҫулталӑкри социаллӑ педагог» - Яна Молодцева (Шупашкар), «Чи лайӑх учитель-дефектолог» - Татьяна Гаранина (Ҫӗнӗ Шупашкар), «Чи лайӑх тӑван чӗлхе учителӗ» - Ираида Матьянова (Шупашкар), «Сывлӑх енчен хавшак ачасемпе ӗҫлекен чи лайӑх педагог» - Ирина Петрова (Йӗпреҫри интернат шкул), «Ҫулталӑкри чи лайӑх тьютор» - Наталия Прагуськина (Шупашкар), «Ҫулталӑкри чи лайӑх методист» - Ксения Коллэ (Шупашкар), «Педагогика дебючӗ» - Игорь Ятмаскин (Шупашкар).
Чӑваш Енӗн Правительствинче тунтикунсерен иртекен ӗнерхи планеркӑра ҫуллахи кану тапхӑрне епле хатӗрленнине те сӳтсе явнӑ.
Кӑҫал пирӗн республикӑра 8 пляж уҫасшӑн, вӗсенчен 5-шӗ Шупашкарта пулӗ, пӗрерӗшӗ — Ҫӗнӗ Шупашкарта, Куславккапа Етӗрне тӑрӑхӗсенче. Унсӑр пуҫне ҫынсене канмалли 120 ытла вырӑн хатӗрлемелле.
«Часах шӑрӑх ҫанталӑк пуҫланӗ, ҫӗртме уйӑхӗн 1-мӗшӗ хыҫҫӑн ҫынсем пляжсене кайма пуҫлӗҫ. Вӗсене хӑвӑртрах хатӗрлесе ҫитермелле», — хушса каланӑ республика ертӳҫи Олег Николаев.
Иртсе кайнӑ пӗр талӑкра пирӗн республикӑра 8 хутчен пушар тухнӑ. Кун пирки Инкеклӗ ӗҫсен министерстви пӗлтернӗ. Ҫӗнӗ Шупашкарта ӗнер, ҫу уйӑхӗн 10-мӗшӗнче вут-ҫулӑмпа кӗрешнӗ. Пушар Коммунистически урамри общежитире тухнӑ. Унти пӗрремӗш хутра сӗтел-пукан ҫунма тытӑннӑ. Пушара сӳнтерме 3 техника пырса ҫитнӗ. Ҫынсем шар курман.
Ыран, Ҫӗнтерӳ кунӗнче, Ҫӗнӗ Шупашкарта Nordtroll NTR-120MT музей троллейбусӗ ҫула тухӗ. Унӑн номерӗ – 1091.
Ку троллейбуса Ҫӗнӗ Шупашкара 1997 ҫулхи ҫурла уйӑхӗнче илсе килнӗ, ҫурлан 26-мӗшӗнче ӑна маршрут ҫине кӑларнӑ. Вӑл – Раҫҫейре тата тӗнчере Nordtrol-120MTr моделӗн юлашки экземплярӗ.
2023 ҫулта ҫак троллейбус музей экспоначӗн статусне тивӗҫнӗ.
Ака уйӑхӗн 18-мӗшӗнче Ҫӗнӗ Шупашкарта Совет тата Винокуров урамӗсенчи суту-илӳ центрӗсенче мина хунӑ тесе хыпар килнӗ. Кинолог йытӑпа вырӑна тӗрӗслеме ҫитнӗ. Телее, нимӗнле мина та пулман. Ҫынсене те эвакуацилеме тивмен.
Шӑнкӑравлакана тупнӑ. Вӑл – 34 ҫулти хӗрарӑм. Вӑл ӳсӗрле хӗр тусӗн телефонӗнчен шӑнкӑравласа мина хуни пирки пӗлтернӗ. Ун тӗлӗшпе пуҫиле ӗҫ пуҫарнӑ. Ӑна 700 пин тенкӗ таран штраф тӳлеттерме е 5 ҫул таран тӗрмене хупма пултараҫҫӗ.
Ака уйӑхӗн 12-мӗшӗнче Ҫӗнӗ Шупашкарти лавккасенчен пӗринчен ҫипуҫ ҫухалнӑ. Унта ӗҫлекенсем пӗлтернӗ тӑрӑх, лавккана виҫӗ хӗрарӑм кӗнӗ. Вӗсем ача кӳмипе пулнӑ. Лавккари ҫипуҫа вӗсем кӳмене хурса тӳлемесӗр тухса кайнӑ. Пурӗ 25 пин тенкӗлӗх вӑрланӑ.
Вӗсене Улатимӗр облаҫӗнче тытса чарнӑ. Вӗсем «Тойота» автомобильпе пынӑ. Вӑрасем пурте Мускавран, 23-37 ҫулсенче. Вӗсенчен пӗрин ача пур, тепри ҫывӑх вӑхӑтра амӑшӗ пулма хатӗрленет.
Кӑҫалхи пӗрремӗш кварталта пирӗн республикӑра 958 мӑшӑр ҫемье ҫавӑрнӑ. Ку цифра пӗлтӗрхи ҫав тапхӑртинчен 12,7 процент нумайрах. Ун чухнехи виҫӗ уйӑхра 850 мӑшӑр пӗрлешнӗ.
Кӑҫалхи пӗрремӗш кварталта Шупашкарти загсра 264 мӑшӑр ҫырӑннӑ, Ҫӗнӗ Шупашкарта — 118, хулари Калинин тата Ленин районӗсенче — 95 тата 92. Шупашкар тӑрӑхӗнче 46 мӑшӑр ҫемьеленнӗ, Ҫӗрпӳ районӗнче — 26, Патӑрьел районӗнче — 21, Муркаш районӗнче — 20.
Мӑшӑрсенчен ытларахӑшӗ ҫемье ҫавӑрма заявленине патшалӑх пулӑшӑвӗсен порталӗ урлӑ панӑ.
Ҫӗнӗ Шупашкар пуҫлӑхӗ Максим Семенов хӑйӗн дожноҫӗнче малалла ӗҫлӗ. Ӑна депутатсем отставкӑна ярайман – сасӑ ҫитмен.
Ҫӗнӗ Шупашкар хулин хӑш-пӗр депутачӗ ӑна отставкӑна яма ыйтнӑ-мӗн. Паян пуху иртнӗ, унта журналистсене кӗртмен.
«Грани» хаҫат пӗлтернӗ тӑрӑх, пухура пулнӑ 18 депутатран 14-шӗ Семенова отставкӑна ярассишӗн сапланӑ. (Пӗтӗмпе – 25 депутат). Ку 56 процентпа танлашнӑ.
+17.3 °C